因為阿母有peh山的興趣，我對細漢開始，著綴咧去過袂少這馬的囡仔人無啥會去的山區。逐擺佇路上看著古錐的花草，又閣是佇山頂看著壯麗的風景，我攏會想講，若毋是有一個大能的存在，這个世間哪有可能有按呢的造物。嘛因為爸母的教育方針，我嘛學了一寡音樂佮美術，接觸過美妙的歌曲佮畫作。欣賞彼寡藝術作品的時，我嘛會想講，創作者一定是受著彼个大能的存在的感動，才有法度佮藏佇表象下底的靈魂表現出來。雖然彼當陣我袂共彼个大能的存在叫做神，抑是上帝，毋過會用講，我對細漢時著直直相信神的存在。
毋過先勿講全世界，干焦台灣著一大堆宗教，大部分的宗教嘛攏講家己相信的神才是真的，予人分袂清到底愛聽啥物人的話。而且除非是面對決心成為神職人員的人，大部分的宗教嘛袂用邏輯、用道理來解說信仰，只會曉叫人用心去祈求、去感受，又閣是唸毋知影意思的經文幾仔擺。當然，對一個信仰來講，彼是誠重要的，煞無法度消除宗教佮學校學著的知識的矛盾，我因此始終無閣較親近任何宗教。
一直到後來，為著小說的取材，我來到離厝上近的長老教會德生教會。佇遮，我除了禮拜，嘛參加過慕道班、學道班、查經班、小組。認真讀過經文以後，我才第一擺發現聖經比起其他宗教的經典，會用算是非常白話，袂為著展現神聖抑是深奧，用一寡早著無人咧用的詞，閣會不時更新、抑是翻譯無仝語言的版本，只為著共福音傳予每一個人。而且，毋管佇佗一個團體，逐家攏會根據時代背景佮前後文，討論聖經的內容，嘛會點出無合時宜的段落，拍破了我對宗教的既定印象。所以，我開始佇眾人的𤆬領之下，一步一步有方法的接近上帝。
紲落來，我才發覺著上帝毋只哩是用大自然佮藝術來向我展現家己，其實對誠久以前，著安排我上長老教會辦的幼稚園、佮阿爸參加召會的聚會、佇大學拄著召會的朋友……等等，我煞無法度克服心中的憢疑，才會直直無決志。好佳哉上帝無放拺我，閣一擺送我到教會，這擺，我總算家己決定欲親近上帝。
受洗了後，我想我可能猶是有時會懷疑上帝的旨意，毋過因為已經揣著驗證信仰的方法，閣有做伙向前的兄弟姊妹，應當嘛著有法度挑戰彼个懷疑。期待有一工，真正堅定的信仰，會佇不斷用行動來戰勝懷疑的過程中，慢慢仔建立起來。