人定定咧講，基督徒想欲佮上帝有好的關係，就愛捷祈禱。毋過，咱的祈禱上帝敢真正有向耳空來聽，拄拄好，我最近有兩个經驗會使佮逐家分享。
歇熱進前，我是一个國中三年級的學生，逐工為著欲升高中的會考拍拚，愈來愈接近考試的時，我足緊張，到賰無一禮拜，我緊張甲睏袂去。連牧師佮幾若个輔導來阮兜為我祈禱，吳牧師嘛傳錄音的祈禱予我，我佇欲睏進前那聽那綴咧祈禱，真正就較袂緊張，就睏會去矣。感謝上帝，嘛足感謝𪜶。
今年歇熱，阮規家伙仔去日本旅行，有一工，阮欲去𬦰一座足懸ê山，愛換兩遍流籠到1800公尺懸的山頂了後，才開始行，地圖寫講愛行點半鐘才會到位，就會當看著彼个足媠的，火山造成的湖，規片青蘢蘢的湖水，佇別位是看無的。毋過，山頂的路是大大細細的石頭仔路，無蓋好行。阮知影山頂的溫度會較低，前一工，阿爸用熱天平地的氣溫去推算山頂的溫度，叫阮愛穿長䘼的衫佮褲，毋過無按算著彼工山頂的風真透，袂輸咧做風颱，吹甲人攏徛袂在，親像阿爸彼種身材較勇的，每一跤步嘛踏甲真艱苦矣，毋免講像我這種瘦閣薄板的，足驚予風吹一下就跋倒。阿姊佮我仝款驚惶，伊的手機仔那充電那規路錄影，一方面記錄這個特別的經驗，一方面想講，萬不幸阮四個外國人，佇日本山頂昏倒，予欲救阮的人知影發生啥物代誌。
佇遮爾驚惶不安的時陣，我雄雄想著詩篇23篇，因為這是我上愛的經節，我早就背起來矣，我就那行那祈禱那念，「耶和華是我的牧者，我無欠缺。伊互我倒佇青翠的草埔，導我佇安靜的水邊……」尤其念到「我雖然行過死蔭的山谷，亦呣驚災害，因為你佮我佇在；你的槌，你的枴，安慰我。」這句「行過死蔭的山谷」袂輸咧講我現此時的狀況。真神奇，我念三四遍了後，我開始袂驚惶，規個人變甲活跳跳，體會著上帝同在的平安是偌爾仔美好。
祈禱了後，我的心袂閣驚；祈禱了後，我的心平靜落來。恁講，上帝敢有咧聽我祈禱？